Pensiyalar yenidən artırılmaq istəyilir
Pensiyaların artırılması və artıq ödənilmiş pensiyaların tutuluşu qaydalarına yenidən baxılması tələbi qoyulub.
Metbuat.az xəbəri bildirir ki, bu, Milli Məclisin İnsan hüquqları komitəsinin bu gün keçirilən iclasında müzakirəyə çıxarılan “Azərbaycan Respublikasının İnsan Hüquqları üzrə Müvəkkilinin (Ombudsmanın) 2025-ci il üzrə məruzəsi”ndə əksini tapıb.
Ombudsmanın pensiya sahəsində aşağıdakı təkliflərlə çıxış edir:
– əmək pensiyasının minimum məbləği artırıldıqda, həmin artım məbləğindən asılı olmayaraq, təyin edilmiş bütün pensiya məbləğlərinin müvafiq artıma mütənasib yox eyni məbləğdə (ya da faiz nisbəti ilə) artırılması;
– əmək pensiyasının və əmək pensiyasına əlavəin artıq ödənilməsinin pensiyaçının səhvindən baş vermədiyini, bu halın müvafiq qurumun fəaliyyətində olan funksional nöqsanlarla bağlı olduğunu və sonrakı tutulmaların əmək pensiyaçısının sosial vəziyyətini ağırlaşdırdığını nəzərə alaraq, artıq ödənilmiş əmək pensiyası və əmək pensiyasına əlavənin məbləğinin əmək pensiyasından tutulması üçün “Əmək pensiyaları haqqında” qanunun 39.1-ci maddəsində nəzərdə tutulmuş müddətin 1 ilə azaldılması (hazırda bu tutulmanın son 3 il üçün aparılması nəzərdə tutulur);
– dövlət qulluğunda azı 35 il iş stajı olan şəxslərin güzəştli şərtlərlə əmək pensiyası hüququ olan şəxslər siyahısına daxil edilməsi və bununla bağlı “Əmək pensiyaları haqqında” qanuna müvafiq dəyişikliklərin edilməsi;
– pensiya yaşına az qalmış işsiz şəxslərin məşğulluğunu təmin etmək məqsədilə Nazirlər Kabinetinin 2020-ci il 13 may tarixli 168 nömrəli Qərarı ilə təsdiq edilmiş “Özünüməşğulluğun təşkili Qaydası”nın 1.2-ci bəndində həmin şəxslərə münasibətdə nəzərdə tutulmuş iki il müddətin beş il müddətlə əvəz edilməsi və çoxuşaqlı ailələrin sosial müdafiəsinin gücləndirilməsi məqsədilə həmin bənddə himayəsində üç və ya daha çox uşağı olan şəxslərin də nəzərə alınması ilə bağlı dəyişikliklərin edilməsi.
Mənbə: https://sonxeber.az/389036/pensiyalar-yeniden-artirila-biler
