Adi bir daş kimi görünür, sahillərdə tapan milyoner olur
Balina qusuntusu kimi tanınan ambergris fırtınalardan sonra sahillərə çıxdıqda qramı qızılla yarışan qiymətə çatır. Xarici görünüşünə görə adi daş parçasını xatırladan bu nadir maddə xüsusilə parfüm sənayesində yüksək tələbat gördüyü üçün onu tapanlara böyük qazanc gətirə bilir.
Sonxeber.az xarici mediaya istinadən xəbər verir ki, fırtınalı hava şəraitindən sonra okean axınları ilə sahilə sürüklənən ambergris əvvəlcə yosunlu daş təsiri bağışlayır. Lakin suyun təsiri və zaman keçdikcə sərtləşərək daşabənzər quruluşa malik olur. Mütəxəssis rəyi ilə həqiqiliyi təsdiqləndikdən sonra isə bazarda milyonlarla manat dəyərində qiymətləndirilə bilir.
Ambergrisi bu qədər qiymətli edən əsas amil kosmetika və xüsusilə parfüm sektorudur. Dünyaca məşhur ətir istehsalçıları qoxuların qalıcı olmasını artırmaq və esansları sabitləşdirmək üçün bu maddədən istifadə edirlər. Bu səbəbdən şirkətlər ambergris əldə etmək üçün yüksək məbləğlər ödəməyə hazırdır.
Türkiyədə də ötən illərdə bununla bağlı diqqətçəkən hadisələr yaşanıb. Mersin şəhərində keçirilən əməliyyat zamanı onlarla kiloqram ambergris müsadirə olunmuş, onun bazar dəyərinin milyonlarla lirə olduğu açıqlanmışdı.
Mütəxəssislər isə vacib xəbərdarlıq edirlər. Ambergrisin mənbəyi olan İspermeçet balinası qoruma altında olan növlər sırasındadır. Dənizdə təbii proses nəticəsində yaranaraq sahilə çıxan parçaların toplanması qanuni sayılsa da, balinalara zərər vurulması və ya onlara müdaxilə edilməsi ciddi cəzalarla nəticələnə bilər.
Ambergris ispermeçet balinalarının həzm sistemində əmələ gəlir və əslində müdafiə mexanizminin məhsuludur. Bu balinalar qidalandıqları ahtapot və kalamarların həzm olunması çətin olan sərt dimdikvari hissələrinin bağırsaqlarına zərər verməməsi üçün yağlı və mumabənzər ifrazat yaradırlar. Zamanla bu sərt qalıqların ətrafını örtərək bərkiyən maddə müəyyən müddətdən sonra balinanın orqanizmindən xaric olunur və okean sularında üzərək sahillərə qədər gəlib çıxır.
Mənbə: https://sonxeber.az/388166/adi-bir-das-kimi-gorunur-sahillerde-tapan-milyoner-olur
